ඉඩම් තොරතුරු

ඉඩම් කැබැල්ලක මායිම් සහ කෙළවරවල් ස්ථානගත කිරීම සහ පිඹුරු / සිතියම සකස් කිරීම සඳහා ඉඩම් මැනීම සිදු කෙරේ. එයට ඉඩමේ භූ විෂමතාවය සහ ගොඩනැගිලිවල පිහිටීම සහ එහි සිදු කරන ලද වෙනත් වැඩිදියුණු කිරීම් ද ඇතුළත් විය හැකිය.

මෙම ඉඩම් මැනුම් තොරතුරු ඉඩම් සංවර්ධන ව්‍යාපෘති සහ ඉඩම් පරිහරණ සැලසුම් ක්‍රියාකාරකම් සඳහා වැදගත් අවශ්‍යතාවයකි. වර්තමාන හා ඓතිහාසික මැනුම් ලේඛනවල පුළුල් පරාසයක් විවිධ ආකෘති යටතේ මිනින්දෝරු දෙපාර්තමේන්තුවේ සතුව පවතී. බොහෝ ලේඛන සාමාන්‍ය ජනතාවට ලබා ගැනීම සඳහා මිනින්දෝරු දෙපාර්තමේන්තුව මගින් පහසුකම් සලසා ඇත.

මැනුම් පිඹුරු

මැනුම් පිඹුරු යනු තිරස් තලයක ප්‍රක්ෂේපණය කර ඇති පරිදි පෘථිවි පෘෂ්ඨය මත, ආසන්නයේ හෝ පහළින් ඇති ලක්ෂණ යම් පරිමාණයකට කඩදාසි තලයක් මත ඇඳ ඇති චිත්‍රක නිරූපණයක් වේ.

මිනින්දෝරු දෙපාර්තුමේන්තුව විසින් කලින් කලට විවිධ ආකාරයේ පිඹුරු නිෂ්පාදනය කර ඇති අතර ඒවායින් සමහරක් පහත පරිදි වේ.

හිමිකම් පිඹුරු (TP)

1800 වර්ෂයේදී මිනින්දෝරු දෙපාර්තමේන්තුව ස්ථාපිත කිරීමෙන් පසු ප්‍රථමයෙන්ම නිෂ්පාදනය කරන ලද පිඹුරු වර්ගය හිමිකම් පිඹුරු (TP) වේ. විශේෂයෙන්, ලන්දේසි - බ්‍රිතාන්‍ය යුගයේ ඉඩම් පුද්ගලික අංශයට විකිණීමට මෙම පිඹුරු සකස් කර ඇති අතර 1800 - 1942 කාලය තුළ විවිධ වර්ගයේ හිමිකම් පිඹුරු පිළියෙල කර ඇත.

හිමිකම් පිඹුරු වල පිටපත් සර්වේයර් ජනරාල් කාර්යාලයේ (ප්‍රධාන කාර්යාලයේ) ලේඛන කළමනාකරණ සහ වෘත්තීය ප්‍රමිතින් අංශයෙන් හෝ දිස්ත්‍රික් මිනින්දෝරු කාර්යාලයෙන් මහජනතාවට නිකුත් කරනු ලැබේ.

• උපසර්ග නොමැති හිමිකම් පිඹුරු (1,2,3,...)
• 'T' උපසර්ගය සහිත හිමිකම් පිඹුරු ( T1,T2,T3, …)
• රජයේ හිමිකම් පිඹුරු (Cr.T.P. 1, Cr.T.P. 2, …)
• පවරාදීමේ හිමිකම් පිඹුරු
• විහාර හා දේවාලගම් හිමිකම් පිඹුරු

මුලික පිඹුරු (මු.පි.)

මුල් කාලයේදී අවශ්‍ය එක් එක් ඉඩම් කොටස් වෙන වෙනම මැන තනි හිමිකම් පිඹුරු සකස් කරන ලද අතර, පසුව සෑම ඉඩමක් සඳහාම තනි පිඹුරුපත් සකස් කිරීම වෙනුවට, එකිනෙකට යාබද ඉඩම් කොටස් සියල්ල මැන එක් පිඹුරක් සකස් කරන ලදී. මෙම පිඹුරු වර්ගය මුලික පිඹුරු (මු.පි.) ලෙස නම් කරන ලදී.

මුඩුබිම් ආඥාපනත රටට හඳුන්වා දීමත් සමඟ මූලික පිඹුරු සකස් කිරීම රජයේ ඉඩම් සීමිත නාගරික ප්‍රදේශවලට සීමා විය.

• උපසර්ග නොමැති මූලික පිඹුරු (PP)
• "A" උපසර්ගය සහිත මූලික පිඹුරු (PP A)
• "S" උපසර්ගය සහිත මූලික පිඹුරු (PP S)
• දිස්ත්‍රික් උපසර්ගය සහිත මූලික පිඹුරු
• හේන් මැනුම් මූලික පිඹුරු (Chena PP)
• විවිධ මැනුම් මූලික පිඹුරු (MSPP)
• වාරිමාර්ග මැනුම් මූලික පිඹුරු (ISPP)
• වන මැනුම් මූලික පිඹුරු (FSPP)
• නගර මැනුම් මූලික පිඹුරු (TSPP)